A Coruña, 24 de febreiro de 2010.   A Federación Galega de Taekwondo celebrará este sábado 27 de febreiro en Vigo (Centro Social Caixanova) a gala de entrega dos premios 2009, na que se fará un repaso aos éxitos das e dos deportistas galegos no ano recén rematado.

Sen dúbida algunha, o 2009 foi un ano moi positivo para o taekwondo galego no aspecto deportivo, tal e como amosan os resultados: A selección galega absoluta é a vixente campioa de España por equipos e da Copa do Rei; a selección galega sub 21 acadou o título de campioa de España por equipos e a selección galega de exhibición é a vixente campioa de España tanto na categoría infantil como en adultos. Pero ademais, a nivel individual a Federación tivo representantes no podio en todas as competicións internacionais oficiais celebradas durante o ano 2009 (Universiada, Campionato do Mundo, Campionato de Europa sub 21...). E tampouco pode esquecerse que este ano a Federación Galega de Taekwondo organizou tres campionatos de España e un de Europa, nos que puido amosar a súa capacidade organizativa. En resumo, un magnífico ano que será repasado na gala que este ano terá lugar en Vigo, na sede dun dos patrocinadores da Federación, o Centro Social Caixanova.

Haberá premios para clubs, deportistas, xuíces, entidades privadas, administracións... Son moitos os que colaboraron no crecemento do taekwondo galego e por iso a Federación Galega tamén entregará mencións honoríficas a persoas ou entidades que traballaron a prol do noso deporte.

Entre os premiados, atópase Estefanía Hernández (mellor deportista feminina de combate) que este ano se proclamou campioa galega e de España, campioa de España universitaria e campioa da Universiada en Belgrado, para pechar a tempada cun bronce no Mundial de Copenhague. Na categoría masculina, o mellor deportista de combate é Raúl Bouzas, campión galego e de España sub 21, subcampión de España absoluto e campión de Europa sub 21. En técnica, os premiados son David Meilán e Nerea Alamancos, e na categoría promesa os deportistas homenaxeados son Óscar Peón e Sandra Bouzas.

O Natural Sport de Ribeira foi elixido mellor club de Galicia e méritos ten sobrados para iso: gañador do campionato de España de clubs, conta nas súas filas con grandes deportistas que están acadando magníficos resultados tanto a nivel estatal, europeo coma mundial, pola organización de grandes eventos... Magnífico o traballo do Natural, que foi recompensado polo xurado.

No ano 2009 foi elixido mellor técnico deportivo José Loren, pola labor desenvolvida a prol do taekwondo galego na formación tanto de deportistas como de xuíces e árbitros, mentres que Esperanza Meilán é a mellor xuíza de técnica e Francisco Agrelo, o mellor árbitro de combate. Nesta gala, a Federación Galega de Taekwondo tamén premiará aos seus dous patrocinadores privados, Caixanova e Pescanova, xa que sen a súa colaboración sería imposible acadar estes resultados.

Son moitas as categorías premiadas nesta gala do taekwondo galego, na que se celebrarán os éxitos acadados e xa se falarán de novos retos cara ao futuro (seguir mellorando a formación de técnicos, xuíces e árbitros, aumentar o número de licenzas e a implantación do taekwondo, repetir ou mellorar os éxitos deportivos...).